شکیل بدایونی - جینا ہے تجھے جینے کے لئے اے دوست کسی عنوان سے پی

جینا ہے تجھے جینے کے لئے اے دوست کسی عنوان سے پی

جینے کا  بہانہ  ایک  سہی  پینے  کے  بہانے  اور  بھی  ہیں

غنچوں کے چٹکنے پر ہی  نہ  ہوں مصروف  توجہ  اہل  چمن

کچھ نیم  شگفتہ  ہونٹوں  پر  خاموش  ترانے  اور  بھی  ہیں

ہر  تیر  نظر  کی  جنبش  میں  پاتا  ہوں  شکیل  انداز  جنوں

معدوم ہے اب تک جن کا نشاں کچھ ایسے نشانے اور بھی ہیں

یحیی - رہ عاشقی کے مارے رہ عام تک نہ پہنچے

رہ  عاشقی  کے  مارے  رہ  عام   تک  نہ  پہنچے

کبھی صبح تک نہ پہنچے کبھی شام تک نہ پہنچے

مجھے مست  اگر  بنا  دے  یہ   نگاہ  مست  تیری

میرا ہاتھ کیا نظر بھی کبھی جام  تک  نہ  پہنچے

مجھے اپنی  بیکسی  کا  نہیں غم  خیال  یہ   ہے

کہیں بات بڑھتے بڑھتے تیرے نام  تک  نہ   پہنچے

جو  یہ  دور  بیوفا  ہے  تیرا غم  تو   مستقل  ہے

وہ حیات  عاشقی  کیا  جو  دوام  تک  نہ  پہنچے

یہ انوکھی برہمی  ہے  کہ  نہ  بھولے  سے  لبوں  پر

بر سبیل  تذکرہ   بھی  میرے  نام   تک   نہ  پہنچے

کہیں اس طرح بھی روٹھے نہ کسی سے کوئی یحییٰ

کہ  پیام  تک  نہ  آئے  کہ   سلام   تک   نہ   پہنچے

شکیل بدایونی - غم عاشقی سے کہہ دو راہ عام تک نہ پہنچے

غم عاشقی سے کہہ دو راہ  عام  تک  نہ پہنچے

مجھے خوف ہے یہ تہمت میرے نام تک نہ پہنچے

میں نظر سے پی رہا تھا کہ یہ دل نے بدعا دی

تیرا ہاتھ زندگی بھر کبھی  جام  تک  نہ پہنچے

نئی صبح پر نظر ہے مگر  آہ  یہ  بھی  ڈر  ہے

یہ سحر بھی رفتہ رفتہ کہیں شام تک نہ پہنچے

انھیں اپنے دل کی خبریں میرے دل سے مل رہی ہیں

میں جو ان سے روٹھ جائوں تو  پیام  تک  نہ پہنچے

یہ  ادا  یہ  بے   نیازی   تجھے   بے   وفا   مبارک

مگر ایسی  بے  رخی  کیا  کہ  سلام  تک  نہ  پہنچے

اقبال - وہ سجدہ روح زمیں جس سے کانپ جاتی تھی

وہ سجدہ روح زمیں جس سے کانپ جاتی تھی 

اسی   کو   آج    ترستے ہیں   منبر  و   محراب

سنی نہ مصر و فلسطین میں وہ اذاں میں  نے

دیا   تھا   جسے   پہاڑوں کو   رعشہ   سیماب