افتخار ۔ آسمانوں پر نظر کر انجم و مہتاب دیکھ

آسمانوں  پر  نظر  کر  انجم  و  مہتاب  دیکھ

صبح کی بنیاد رکھنی ہے تو پہلے خواب دیکھ

ہم بھی سوچیں گے دعائے بے اثر کے باب میں

اِک  نظر  تو  بھی  تضادِ منبر  و  محراب  دیکھ

دوش پر ترکش پڑا رہنے دے، پہلے دل سنبھال

دل سنبھل جائے تو سوئے سینہٴ احباب دیکھ

موجہٴ سرکش کناروں سے چھلک جائے تو پھر

کیسی کیسی بستیاں  آتی  ہیں  زیرِ آب  دیکھ

بوند  میں سارا سمندر  آنکھ  میں کل کائنات

ایک مشتِ خاک میں سورج کی آب وتاب دیکھ

کچھ قلندر مشربوں سے راہ و رسمِ عشق سیکھ

کچھ  ہم  آشفتہ  مزاجوں  کے  ادب  آداب  دیکھ

شب کو خطِّ نور میں لکھّی ہوئی تعبیر پڑھ

صبح تک دیوارِ آئیندہ میں کُھلتے باب دیکھ

افتخار  عارف  کے  تند  و  تیز  لہجے  پر  نہ  جا

افتخار عارف کی آنکھوں میں اُلجھتے خواب دیکھ

افتخار عارف ۔ بکھر جائیں گے کیا ہم جب تماشا ختم ہو گا

بکھر جائیں گے کیا ہم جب تماشا ختم ہو گا
میرے معبود  آخر  کب  تماشا  ختم  ہو گا

چراغِ حجرہ  درویش  کی  بجھتی   ہوئی   لو
ہوا سے کہہ گئی ہے اب تماشا ختم ہو گا

کہانی میں نئے کردار  شامل  ہو  گئے   ہیں
نہیں معلوم اب کس ڈھب تماشا ختم ہو گا

کہانی آپ  اُلجھی  ہے  کہ اُلجھائی  گئی  ہے
یہ عقدہ تب کُھلے گا  جب تماشا  ختم ہو گا

زمیں جب عدل سے بھر جاے گی نور علی نور
بنامِ   مسلک  و   مذہب   تماشا   ختم   ہو  گا

یہ سب کٹھ پتلیاں رقصاں رہیں گی رات کی رات
سحر  سے  پہلے   پہلے   سب   تماشا   ختم  ہو  گا

تماشا کرنے  والوں   کو  خبر  دی  جا  چکی  ہے
کہ پردہ کب گرے  گا  کب  تماشا  ختم  ہو گا

دلِِ  نا مطمئن  ایسا   بھی   کیا    مایوس   رہنا
جو خلق اُٹھی تو سب کرتب تماشا  ختم  ہو گا

افتخار ـ پَل بھر میں ہو رہے گا حِساب نبود و بُود

پَل بھر میں ہو رہے گا حِساب نبود و بُود

پیچ و خمِ وجود و عدم ، اور کتنی دیر؟ 

دَامن کےسارےچاک، گرِیباں کےسَارےچاک 

ہو بھی گئے بَہم، تو بَہم، اَور کِتنی دیر؟

افتخار - بہاریں جس کی شاخوں سے گوا ہی مانگتی تھیں

بہاریں جس کی شاخوں سے گوا ہی مانگتی تھیں

وہی مو سم ہمیں اب بے ثمر کیوں لگ رہا ہے

در و دیوار اتنے اجنبی کیوں لگ رہے ہیں

خود اپنے گھر میں آ خر اتنا ڈر کیوں لگ رہا ہے

افتخار عارف - صبح کی بنیاد رکھنی ہے تو پہلے خواب دیکھ

آسمانوں پر نظر کر انجم و مہتاب دیکھ

صبح کی بنیاد رکھنی ہے تو پہلے خواب دیکھ

ہم بھی سوچیں گے دعائے بے اثر کے باب میں

اک نظر تو بھی تضاد منبر و محراب دیکھ

دوش پر ترکش پڑا رہنے دے، پہلے دل سنبھال

دل سنبھل جائے تو سوئے سینہٴ احباب دیکھ

موجہٴ سرکش کناروں سے چھلک جائے تو پھر

کیسی کیسی بستیاں آتی ہیں زیر آب دیکھ

بوند میں سارا سمندر آنکھ میں کل کائنات

ایک مشتِ خاک میں سورج کی آب و تاب دیکھ

کچھ قلندر مشربوں سے راہ و رسم عشق سیکھ

کچھ ہم آشفتہ مزاجوں کے ادب آداب دیکھ

شب کو خط نور میں لکھّی ہوئی تعبیر پڑھ

صبح تک دیوار آئیندہ میں کھلتے باب دیکھ

افتخار عارف کے تند و تیز لہجے پر نہ جا

افتخار عارف کی آنکھوں میں اُلجھتے خواب دیکھ

افتخار عارف - خوں بہا - اپنے شہسواروں کو

اپنے شہسواروں کو

قتل کرنے والوں سے

خوں بہا طلب کرنا

وارثوں پہ واجب تھا

قاتلوں پہ واجب تھا

خوں بہا ادا کرنا

واجبات کی تکمیل

منصفوں پہ واجب تھی

منصفوں کی نگرانی

قدسیوں پہ واجب تھی

وقت کی عدالت میں

ایک سمت مسند تھی

ایک سمت خنجر تھا

تاج زرنگار اک سمت

ایک سمت لشکر تھا

اک طرف مقدر تھا

طائفے پکار اٹھے

تاج و تخت زندہ باد"

"ساز و رخت زندہ باد

خلق ہم سے کہتی ہے

سارا ماجرا لکھیں

کس نے کس طرح پایا

اپنا خوں بہا لکھیں

چشم نم سے شرمندہ

ہم قلم سے شرمندہ

سوچتے ہیں کیا لکھیں

افتخار عارف - جاہ و جلال ، دَام و دِرَم ، اَور کتنی دیر؟

جاہ و جلال ، دَام و دِرَم ، اَور کتنی دیر؟

ریگ رواں پہ نقش قَدَم ، اَور کتنی دیر؟

اَب اور کتنی دیر یہ وَحشت، یہ ڈر، یہ خوف؟

گرد و غبارِ  عہدِ ستم ، اور کتنی دیر؟

حلقہ بگوشوں، عرض گزاروں کے درمیاں 

یہ تمکنت یہ زعمِ کرم، اور کتنی دیر؟ 

پل بھر میں ہو رہے گا حساب نبود و بود

پیچ و خمِ وجود و عدم ، اور کتنی دیر؟

دَامن کےسارےچاک، گریباں کےسارےچاک

ہو بھی گئے بہم، تو بہم، اَور کتنی دیر؟

شام آ گئی ہے، ڈوبتا سورج بتائے گا

تم اور کتنی دیر ہو، ہم اور کتنی دیر؟