معین نظامی ۔ میں انہی کھرچے ہوئے لفظوں کا وارث ہوں

میرے اجداد کے گرتے ہوئے حجرے کے محراب خمیدہ میں

کسی صندل کے صندوق تبرک میں

ہرن کی کھال پر لکھا ہوا شجرہ بھی رکھا ہے

کہ جس پر لاجوردی دائروں میں

زعفرانی روشنائی سے مرے سارے اقارب کے مقدس نام لکھے ہیں

مگر اک دائرہ ایسا بھی ہے

جس میں سے لگتا ہے

کہ کچھ کھرچا گیا ہے

میں انہی کھرچے ہوئے لفظوں کا وارث ہوں

فیض ۔ ایسے ناداں بھی نہ تھے جاں سے گزرنے والے

گرمئ شوق نظارہ کا اثر تو دیکھو

گل کھلے جاتے ہیں وہ سایۂ در تو دیکھو

ایسے ناداں بھی نہ تھے جاں سے گزرنے والے 

ناصحو ، پندگرو ، راہگزر تو دیکھو

وہ تو وہ ہے، تمہیں ہوجائے گی الفت مجھ سے 

اک نظر تم مرا محبوب نظر تو دیکھو

وہ جو اب چاک گریباں بھی نہیں کرتے ہیں 

دیکھنے والو کبھی ان کا جگر تو دیکھو

دامن درد کو گلزار بنا رکھا ہے 

آؤ اک دن دل پرخوں کا ہنر تو دیکھو

صبح کی طرح جھمکتا ہے شب غم کا افق 

فیض ، تابندگئ دیدۂ تر تو دیکھو