غالب ـ ابن مریم ہوا کرے کوئی

ابن مریم ہوا کرے کوئی

میرے دکھ کی دوا کرے کوئی

شرع و آئین پر مدار سہی

ایسے قاتل کا کیا کرے کوئی

چال جیسے کڑی کمان کا تیر

دل میں ایسے کے جا کرے کوئی

بات پر واں زبان کٹتی ہے

وہ کہیں اور سنا کرے کوئی

بک رہا ہوں جنوں میں کیا کیا کچھ

کچھ نہ سمجھے خدا کرے کوئی

نہ سنو گر برا کہے کوئی

نہ کہو گر برا کرے کوئی

روک لو گر غلط چلے کوئی

بخش دو گر خطا کرے کوئی

کون ہے جو نہیں ہے حاجت مند

کس کی حاجت روا کرے کوئی

کیا کیا خضر نے سکندر سے

اب کسے رہنما کرے کوئی

جب توقع ہی اٹھ گئی غالب

کیوں کسی کا گلہ کرے کوئی

غالب - پانی سےسگ گزیدہ ڈرے جس طرح اسد

پانی سےسگ گزیدہ ڈرے جس طرح اسد

ڈرتا ہوں آیئنے سے کہ مردم گزیدہ ہوں

غالب - کسی کو دے کے دل کوئی نواسنجِ فغاں کیوں ہو

کسی کو دے کے دل کوئی نواسنجِ فغاں کیوں ہو

نہ ہو جب دل ہی سینہ میں تو پھر منہ میں زباں کیوں ہو

وہ اپنی خو نہ چھوڑیں گے ہم اپنی وضع کیوں چھوڑیں

سبک سر بن کے کیوں پوچھیں کہ ہم سے سرگراں کیوں ہو

کیا غمخوار نے رسوا لگے آگ اس محبت کو

نہ لاوے تاب جو غم کی وہ میرا رازداں کیوں ہو

وفا کیسی کہاں کا عشق جب سر پھوڑنا ٹھہرا

تو پھر اے سنگدل تیرا ہی سنگِ آستاں کیوں ہو

قفس میں مجھ سے رودادِ چمن کہتے نہ ڈر ہمدم

گری ہے جس پہ کل بجلی وہ میرا آشیاں کیوں ہو

یہ کہہ سکتے ہو ہم دل میں نہیں ہیں پر یہ بتلاؤ

کہ جب دل میں تم ہی تم ہو تو آنکھوں سے نہاں کیوں ہو

یہ فتنہ آدمی کی خانہ ویرانی کو کیا کم ہے

ہوئے تم دوست جس کے دشمن اسکا آسماں کیوں ہو

یہی ہے آزمانا تو ستانا کس کو کہتے ہیں 

عدو کے ہو لئے جب تم تو میرا امتحاں کیوں ہو

کہا تم نے کہ کیوں ہو غیر کے ملنے میں رسوائی

بجا کہتے ہو سچ کہتے ہو پھر کہیو کہ ہاں کیوں ہو

نکالا چاہتا ہے کام کیا طعنوں سے تو غالب

تِرے بے مہر کہنے سے وہ تجھ پر مہرباں کیوں ہو

غالب - کیوں نہ ٹھہریں ہدف ناوک بیدار کہ ہم

کیوں نہ ٹھہریں ہدف ناوک بیدار کہ ہم

آپ اٹھا لاتے ہیں جو تیر قضا ہوتا ہے 

غالب - بازیچہٴ اطفال ہے دنیا مرے آگے

بازیچہٴ اطفال ہے دنیا مرے آگے

ہوتا ہے شب و روز تماشا مرے آگے

اک کھیل ہے اورنگِ سلیماں، مرے نزدیک

اک بات ہے اعجازِ مسیحا، مرے آگے

جزنام، نہیں صورت عالم، مجھے منظور

جزوہم، نہیں ہستی اشیاء، مرے آگے

ہوتا ہے نہاں گرد میں صحرا، مرے ہوتے

گھستا ہے جبیں خاک پہ دریا مرے آگے

مت پوچھ کہ کیا حال ہے میرا، ترے پیچھے

تو دیکھ کہ کیا رنگ ہے تیرا، مرے آگے

سچ کہتے ہو خودبین و خود آرا ہوں، نہ کیوں ہوں

بیٹھا ہے بت آئینہ سیما، مرے آگے

پھر دیکھئے انداز گل افشانی گفتار

رکھ دے کوئی پیمانہٴ صہبا، مرے آگے

نفرت کا گماں گزرے ہے، میں ر شک سے گزرا

کیوں کر کہوں ”لونام نہ ان کا مرے آگے“

ایماں مجھے روکے ہے، جو کھینچے ہے مجھے کفر

کعبہ مرے پیچھے ہے، کلیسا، مرے آگے

عاشق ہوں، پہ معشوق فریبی ہے مرا کام

مجنوں کو برا کہتی ہے، لیلیٰ، مرے آگے

خوش ہوتے ہیں، پر وصل میں یوں مر نہیں جاتے

آئی شبِ ہجراں کی تمنا، مرے آگے

ہے موج زن اک قلزمِ خوں، کاش، یہی ہو

آتا ہے، ابھی دیکھئے، کیا کیا، مرے آگے

گو ہاتھ کو جنبش نہیں، آنکھوں میں تو دم ہے

رہنے دو ابھی ساغر و مینا مرے آگے

ہم پیشہ وہم مشرب وہم راز ہے میرا

غالب کو برا کیوں کہو؟ اچھا مرے آگے

غالب - مدت ہوئی ہے یار کو مہماں کئے ہوئے

مدت ہوئی ہے یار کو مہماں کئے ہوئے

جوشِ قدح سے بزم چراغاں کئے ہوئے

کرتا ہوں جمع پھر جگرِ لخت لخت کو

عرصہ ہوا ہے دعوتِ مژگاں کئے ہوئے

پھر وضعِ احتیاط سے رکنے لگا ہے دم

برسوں ہوئے ہیں چاک گریباں کئے ہوئے

پھر گرمِ نالہ ہائے شرر بار ہے نفس

مدت ہوئی ہے سیرِ چراغاں کئے ہوئے

پھر پرسشِ جراحتِ دل کو چلا ہے عشق

سامانِ صد ہزار نمکداں کئے ہوئے

پھر بھر رہا ہوں خامہٴ مژگاں بہ خونِ دل

سازِ چمن طرازیٴ داماں کئے ہوئے

باہم دگر ہوئے ہیں دل و دیدہ پھر رقیب

نظارہ و خیال کا ساماں کئے ہوئے

دل پھر طواف، کوئے ملامت کو جائے ہے

پندار کا صنم کدہ ویراں کئے ہوئے

پھر شوق کر رہا ہے خریدار کی طلب

عرضِ متاعِ عقل و دل و جاں کئے ہوئے

دوڑے ہے پھر ہر ایک گل و لالہ پر خیال

صد گلستاں نگاہ کا ساماں کئے ہوئے

پھر چاہتا ہوں نامہٴ دلدار کھولنا

جاں نذرِ دلفریبیٴ عنواں کئے ہوئے

مانگے ہے پھر کسی کو لبِ بام پر ہوس

زلفِ سیاہ رخ پہ پریشاں کئے ہوئے

چاہے ہے پھر کسی کو مقابل میں آرزو

سرمے سے تیز دشنہٴ مژگاں کئے ہوئے

اک نوبہارِ ناز کو تاکے ہے پھر نگاہ

چہرہ فروغ مے سے گلستاں کئے ہوئے

پھر جی میں ہےکہ در پہ کسی کےپڑے رہیں

سر زیر بارِ منتِ درباں کئے ہوئے

جی ڈھونڈتا ہے پھر وہی فرصت کے رات دن

بیٹھے رہیں تصورِ جاناں کئے ہوئے

غالب ہمیں نہ چھیڑ، کہ پھر جوشِ اشک سے

بیٹھے ہیں ہم تہیّہٴ طوفاں کئے ہوئے